bauds

Bauds, m. pluriel, c'est une espece de chiens courans blancs la plus part et les meilleurs tous d'une piece, que le Fouilloux surnomme greffiers, lesquels ne sont pas communs à couvrir toutes bestes, ains seulement le cerf, pour laquelle cause aucuns les appellent Chiens cerf, Canes, la race desquels selon l'opinion dudit Fouilloux est venuë de barbarie, où ces chiens et mesme la meute du Cherif, l'un des Roys de Mauritanie, sont tous blancs, avec lesquels on y prent le Ranger à force: s'accordant Phebus à ceste opinion, disant qu'il a esté audit pays où il a veu prendre le Ranger à force à des chiens qu'il nomme bauds. Ils sont beaux chasseurs requerans, forcenans et de haut nez qui ne laissent pour chaleurs qui puissent estre à chasser sans se rompre à la foule des picqueurs ne au bruict et cry des hommes, et gardent mieux le change que nuls autres chiens et sont de meilleure creance, mais veulent estre accompagnez de picqueurs, craignent l'eauë en temps d'hyver, et sont subjets à courir au bestiail privé. Aucuns les appellent Chiens Muets, d'autant que venant le cerf au change, ne dient mot jusques à ce qu'il en soit hors, Canes echemythi, pythagorei, harpocratici, B. Il y en a qui disent, qu'ils sont appelez bauds par ce qu'ils sont hardis et deliberez.

Thresor de la langue françoyse. Jean Nicot.